1 Keunenks 21
01Dou gebeurde dit: Jizreëliet Nabot haar in Jizreël n droevetoen, stoef bie pelaais van keunenk Achab van Samaria.
02"Dou mie joen droevetoen," zee Achab tegen Nabot, "den kin ik doar gruinte baauwen. Hai ligt ja stoef bie mien pelaais. Ik zel joe der n betere droevetoen veur in stee geven, mor as ie dat laiver hebben den dou k joe der geld veur."
03Mor Nabot zee tegen Achab: "Mag de HEER mie der veur bewoaren dat ik t aarfdail van mien veurvoaders aan joe ofstoa."
04Achab ging noar hoes, vranterg en vergrèld, omdat Nabot tegen hom zegd haar dat hai grond dij hai van zien veurolden aarfd haar nait ofstoan wol. Hai ging op bèr, kop ston hom verkeerd en eten wol hai nait.
05Izebel, zien vraauw, kwam bie hom en vroug: "Woarom bistoe zo opsternoat en wilst nait eten?"
06"Ik heb mit Nabot van Jizreël proat," zee hai tegen heur, "en hom vroagd om mie zien droevetoen te verkopen. As hai dat laiver haar, kon hai der n aander droevetoen veur weeromkriegen. Mor hai zee: 'Ik wil joe mien droevetoen nait verkopen.'"
07Dou zee Izebel, zien vraauw, tegen hom: "Wat! Bistoe keunenk van Israël? Kom der òf, goa eten, doar knapstoe van op. Ikzulm zel die dij droevetoen van Nabot oet Jizreël geven."
08Op noam van Achab schreef zai braiven, zegelde dij mit zien zegel en stuurde dij aan oldsten en vernoamsten van stad doar Nabot woonde.
09In dij braiven ston: "Roup n vastendag oet en loat Nabot veuraan zitten as t volk bie nkander komt.
10 Zet twij deurhèn gemaine kerels tegen hom over en loaten ze hom, doar aal t volk bie is, beschuldegen dat hai God en keunenk lasterd het. Breng hom den boeten stad en staineg hom."
11 Lu van zien stad, oldsten en vernoamsten dij mit hom in stad woonden, deden zo as Izebel opdruig in braiven dij zai heur stuurd haar.
12 Zai raipen n vastendag oet en luiten Nabot veuraan zitten dou t volk bie nkander kwam.
13 Dij minne kerels gingen tegen hom over zitten en beschuldigden hom, doar t volk bie was, dat hai God en keunenk vervlökt haar. Ze brochten hom boeten stad en stainegden hom.
14 Aan Izebel stuurden ze t bericht dat zai Nabot stainegd haren en dat hai dood was.
15 Dou Izebel dat heurde, zee ze tegen Achab: "Kom, aigen die toen van Nabot oet Jizreël tou, dij hai die nait veur geld doun wol. Nabot is ter nait meer, hai is dood."
16 Dou Achab heurde dat Nabot van Jizreël dood was, kwam hai in t èn om noar droevetoen van Nabot te goan en dij in beslag te nemen.
17 t Woord van de HEER kwam bie Tisbiet Elia:
18 "Moak die kloar om noar Achab, keunenk van Israël, te goan, dij in Samaria woont. Hai is noar droevetoen van Nabot goan om dij in beslag te nemen.
19 Most tegen hom zeggen: 'Dit zegt de HEER: Hestoe n moord pleegd en t aarfgoud roofd?' Zeg hom ook: 'Zo zegt de HEER: Op t stee doar honden t bloud van Nabot opslikt hebben, zellen ze joen bloud opslikken.'"
20 Dou Achab Elia zag zee hai: "Het mien vijand mie vonden?" "Joa," zee Elia, "ik heb joe vonden omdat ie joe der tou laind hebben mit te doun wat verkeerd is in ogen van de HEER.
21 Heur aan, ik zel onhaail brengen over joe, zegt de HEER, en joe votraggen en in Israël ales wat mannelk is van Achab oetreuden van hoog tot leeg.
22 Ik zel mit joen hoes net zo doun as mit t hoes van Jerobeam, zeun van Nebat, en mit t hoes van Basa, zeun van Achia, omdat ie de HEER taargd hebben deur Isrelieten tot zunde aan te zetten.
23 En over Izebel het de HEER zegd: Honden zellen heur opvreten bie stadsmuur van Jizreël.
24 Dij van Achab in de stad staarft, zel deur honden opvreten worden en dij in t veld staarft, zel opvreten worden deur vogels."
25 (En joa, der het gainain west dij zok zo verkocht het as Achab, mit kwoad te doun, deur te doun wat de HEER slecht vindt. t Was Izebel, zien vraauw, dij hom doar tou aanzet haar.
26 t Was vrezelk, hou hai ofgoden achternoa laip, aalmoal net as Amorieten doan haren dij de HEER veur Israël votjagd haar.)
27 Amper haar Achab dit heurd, of hai dee t bouteklaid aan doar hai ook in slaip, hai vastte en laip mit kop omdeel.
28 Doarom kwam t woord van de HEER bie Tisbiet Elia:
29 "Heb ie zain hou Achab zok veur mie vernederd het? Doarom zel ik t onhaail nait in zien doagen over hom kommen loaten, mor in doagen van zien zeun."
|
